«Ең үлгили жас китапқумар», «Ең үлгили китапқумар студент» ҳәм «Ең үлгили китапқумар шаңарақ»

Университет мәлимлеме-ресурс орайында Өзбекистан жаслар аўқамы Нөкис қалалық Кеңеси тәрепинен «Ең үлгили жас китапқумар», «Ең үлгили китапқумар студент» ҳәм «Ең үлгили китапқумар шаңарақ» таңлаўлары өткерилди

 Президентимиз Ш.М.Мирзиёевтың 2017-жыл 5-июлдағы «Жасларға байланыслы мәмлекетлик сиясаттың нәтийжелилигин арттырыў ҳәм Өзбекистан Жаслар Аўқамының жумысын қоллап-қуўатлаў ҳаққында»ғы Пәрманында жасларда китап оқыў ҳәм китапқумарлық мәдениятын асырыўға қаратылған «Мен сүйип оқыған китап», «Ең жақсы китапқумар» республика таңлаўлары, «Китап байрамы» ҳәм «Балалар китаплары» дәстүрий республика фестиваллары, Ўатанға муҳаббат ҳәм оның тәғдирине өз үлесимизди қосыўға бағдарлаўшы акциялар, жазыўшы-шайырлар, әдебиятшы алымлар менен дөретиўшилик ушырасыўлар ҳәм мастер класслар системалы түрде шөлкемлестирилиўи белгиленген еди. Усы бағдардағы жумысларды әмелге асырыў бойынша оқыў орынларында түрли мазмунда таңлаўлар өткерилмекте.

Усы жылдың 30-март күни университет мәлимлеме-ресурс орайында Өзбекистан жаслар аўқамы Нөкис қалалық Кеңеси тәрепинен орта арнаўлы оқыў орынларында оқып билим алып атырған оқыўшы жасларды китап оқыўға қызықтырыў, олардың бос ўақытларын мазмунлы өткериў, жаслардың билим ҳәм көнликпелерин еле де күшейтиў мақсетинде «Оқыў заўқы» ураны астында «Ең үлгили жас китапқумар» таңлаўының қалалық басқышы өткерилди.

20180331_103807Онда Нөкис қаласындағы орта арнаўлы оқыў орынларынан жәми 26 кәсип-өнер колледж ҳәм академиялық лицейлерден оқыўшы жаслар қатнасты. Таңлаўға Өзбекистан Жаслар аўқамы Нөкис қалалық Кеңеси баслығы А.Пиржанов басшылық етти. Таңлаўда университет мәлимлеме-ресурс орайы қәнигелери Ш.Нәўбетова, А.Алучиев ҳәм Өзбекистан Жаслар аўқамының белсенди ағзасы М.Абдуллаевлар төрешилик етти. Таңлаў қатнасыўшылары «Шығармалар билимданы» ҳәм «Ең көп китап оқыўшы билимдан» атамасындағы шәртлер бойынша өз-ара беллести. Таңлаў жуўмағында 1-орынды ТашПМИ НФ академиялық лицейи оқыўшысы Гулқумар Абатбаева, 2-орынды ҚМУ академиялық лицейи оқыўшысы Тимур Юлдашбаев, 3-орынды Нөкис транспорт колледжиниң оқыўшысы Парахат Қазақбаевлар жеңип алды. «Ең үлгили жас китапқумар» таңлаўы көтериңки руўҳда жуўмақланып, 31-март күни «Ең үлгили китапқумар шаңарақ» таңлаўына нәўбетти берди. Бул таңлаў Нөкис қаласындағы мәкан пуқаралар жыйынлары аймағында жасаўшы шаңарақлар арасында өткерилди ҳәм қатнасыўшылар «Бердақ шығармаларының билимданы», «Әжинияз шығармаларының билимданы», «Ибрайым Юсупов шығармаларының билимданы», «Төлепберген Қайыпбергенов шығармаларының билимданы» атамасындағы шәртлер бойынша өз-ара беллести.

«Ең үлгили китапқумар шаңарақ» таңлаўы жуўмағында 1-орынды Дилбар Сметова, 2-орынды Гүлзада Хожаназарова, 3-орынды Қәдир Шерназаровлар ийеледи. Жеңимпазлар Өзбекистан жаслар аўқамы Нөкис қалалық Кеңеси тәрепинен диплом ҳәм қымбат баҳалы саўғалар менен сыйлықланды. Таңлаў барысында ықласбентлерден ибарат көпшилик жасларымыз   университет мәлимлеме-ресурс орайындағы жаратылған имканиятлар менен кеңнен танысты.

Еки күн даўамында өткерилген таңлаў университет жасларына байрам кейпиятын бағышлады ҳәм олардың китап оқыўға болған ыкласын еле де арттырып, китапкумарлыкты үгит-нәсиятлаўда тийкарғы бағдар болды.

photo_2018-04-20_09-15-32

photo_2018-04-20_09-17-47

 Азамат Алучиев

Мәлимлеме-ресурс орайы қәнигеси

Өткерилген таңлаў баянламасы  pdf